Azərbaycan, Bakı, 14 aprel /Trend, müxbir E.Əliyev/
Martda Bakıda təkrar daşınmaz əmlak bazarında qiymətlər 2,01 faiz artıb. Bunu bazar ertəsi Trend-ə "MBA Group" konsaltinq şirkətinin baş direktoru Nüsrət İbrahimov deyib.
Onun sözlərinə görə, mart ayının nəticələrinə əsasən, paytaxtın təkrar bazarında mənzilin 1 kvadratmetrinin qiyməti 2032 dollar təşkil edib: "İlkin bazara gəlincə, belə mənzilin 1 kvadratmetri ay ərzində 2,54 faiz bahalaşıb və qiyməti 1213 dollar təşkil edib".
N.İbrahimov qeyd edib ki, qiymət artımı Bakıda aparılan söküntü işlərinin genişlənməsinə təsir edib: "İlk növbədə, söküntü işlərinin miqyasının genişlənməsi ilə bazara xeyli sayda alıcı çıxır, tələbat artır və bununla da qiymətlərin dinamikası dəyişir".
O bildirib ki, xüsusən, bu, Bakının Abşeron və Qaradağ rayonlarına aiddir: "Həmin ərazilərdə kifayət qədər mənzil tikilir. Satıcıların aktivliyinə gəlincə, satışlar Abşeron rayonunda və Yeni Yasamal qəsəbəsində cəmləşib".