Azərbaycan, Bakı, 9 iyul /Trend, müxbir Zülfiyyə Qurbanova/
2014-cü ilin birinci yarısında daşınmaz əmlak bazarında qiymətlər 9,5 faiz artıb. Bunu Trend-ə "MBA Group" konsaltinq şirkətinin baş direktoru Nüsrət İbrahimov deyib.
Onun sözlərinə görə, mənzil bazarında nisbətən daha çox 18,9 faiz artım müşahidə olunub: "Artan tələb fonunda mənzil bazarında təklif azalıb, buna görə də qiymətlər maksimum artıb. Bu gün Azərbaycanda əsasən biznes və elit sinfindən olan mənzillər tikilir. Ölkədə kütləvi və ekonom sinif mənizllər demək olar ki, inşa edilmir. Buna görə də orta qiymətlər belə sürətlə artır".
N.İbrahimov qeyd edib ki, belə vəziyyət torpaq bazarında da müşahidə olunur: "Daşınmaz əmlak bazarında qiymətlərin artması səbəbindən torpağın qiyməti də bahalaşır. Yanvar-iyun aylarında torpaq bazarında qiymətlər 7,3 faiz təşkil edib".
O, əlavə edib ki, ilin birinci yarısında kommersiya daşınmaz əmlak bazarında qiymətlər praktiki olaraq dəyişməyib: "2014-cü ilin ilk altı ayı ərzində ilkin mənzil bazarında qiymət artımı 17 faiz, təkrar bazarda isə 15 faiz təşkil edib".
Ekspert onu da qeyd edib ki, yay aylarında qiymətlərin azalması qaçılmazdır, buna görə də mövsümün sonunda qiymətlər 2-3 faiz aşağı düşür: "Lakin ilin sonuna hər halda bu azalma kompensasiya olunacaq və il ərzində artım göstəricisi 20 faizə yaxın təşkil edəcək".
