Azərbaycan, Bakı, 2 avqust /Trend, müxbir İlahə Məmmədli/
Azərbaycanın İqtisadiyyat və Sənaye Nazirliyi yanında Sahibkarlığa Kömək Milli Fondu (SKMF) 2014-cü ilin birinci yarısında kreditlərin böyük hissəsini (güzəştli maliyyələşdirmənin ümumi həcmindən 64 faiz) kənd təsərrüfatı məhsullarının istehsalına və emalına yönəldib. Trend-in məlumatına görə, bu barədə Fondun rəsmi mətbuatda dərc olunmuş balans hesabatında deyilir.
Bu sahədə 2539 layihənin maliyyələşdirilməsinə 82,56 milyon manat məbləğində vəsait ayrılıb ki, bundan 80,32 milyon manat kənd təsərrüfatı məhsullarının istehsalının payına düşüb. Emal sahəsində beş layihəyə 2,24 milyon manat yönəldilib. Bu layihələrin reallaşdırılması nəticəsində yaradılacaq iş yerlərinin ümumi sayı 5093 ədəddir.
Yanvar-iyun ayları ərzində SKMF istehsalın və sənaye məhsulunun emalının müxtəlif sahələrində ümumi məbləği 20,5 milyon manat olan (ayrılan vəsaitlərin ümumi həcminin 15,9 faiz xüsusi çəkisi ilə) 89 layihə maliyyələşdirib. Həmin layihələrin reallaşdırılması nəticəsində 601 iş yerinin yaradılması təmin olunub.
2014-cü ilin birinci yarısında Fond tərəfindən maliyyələşdirilən layihələrin 98,1 faizi kiçik kreditlərin (30,17 milyon manat məbləğində və ya kreditlərin ümumi həcminin 23,4 faizi) payına düşüb. Bu dövr ərzində Fond 2,69 milyon manat məbləğində 19 orta (0,7 faiz), 96,18 milyon manat məbləğində isə 31 iri həcmli kredit (1,2 faiz) ayırıb.
Yanvar-iyun aylarında SKMF müvəkkil kredit təşkilatları vasitəsilə 129,04 milyon manat məbləğində 2632 kredit verib.
SKMF bu il 280 milyon manat dəyərində kredit ayırmağı planlaşdırır. Bu vəsaitdən 130 milyon manat kreditlərin geri qaytarılması, qalan 150 milyon manat isə dövlət büdcəsi vəsaitləri hesabına təmin ediləcək.
