Azərbaycan, Bakı, 4 avqust /Trend, müxbir İlahə Məmmədli/
"Avesta" konserninin həyata keçirdiyi "Khazar Islands" yaşayış kompleksinin tikintisi üzrə layihənin birinci mərhələsini 2022-ci ilə başa çatdırmaq planlaşdırılır. Bunu Trend-ə konsernin rəhbəri Hacı İbrahim İbrahimov deyib.
Daha əvvəl birinci mərhələnin reallaşdırılmasının 2017-ci ildə başa çatdırılması planlaşdırılırdı.
Onun sözlərinə görə, layihənin yekunlaşmasının müddəti investisiya qoyuluşlarından asılıdır: "Biz onun tam həyat keçirilməsinin 2030-2035-ci illərdə mümkün olacağını gözləyirik".
İbrahimov qeyd edib ki, hazırda Çexiyanın "Raiffaizen Bank"ı ilə yaşayış evləri kompleksinin tikintisinə 390 milyon dollar kreditin ayrılması üzrə danışıqlar aparılır: "Türkiyənin "Nurol Bank"ı ilə artıq 500 milyon dollar həcmində kredit sazişi imzalanıb, Türkiyənin "Eximbank"ı isə bu məqsədlər üçün 30 milyon dollar kredit ayırıb".
O vurğulayıb ki, xarici banklar 7 il müddətinə vəsait ayırmağa hazırdırlar: "Khazar Islands" layihəsinin reallaşdırılmasına investisiya axını xarici səhmdarların kompleksin yerləşdiyi yerlə və onun ərazisində aparılan işlərlə tanışlığından sonra başlayıb. İndiyədək işlər şəxsi investiyalar hesabına aparılırdı və yatırılmış vəsaitlərin ümumi həcmi 1,650 milyard dollar təşkil edir. Güman edirəm ki, kompleks investisiyaların həcmi 2 milyard dollaradək çatdırıldıqdan sonra işə düşəcək".
Layihənin ümumi dəyəri 100 milyard dollar həcmində qiymətləndirilir. Kompleks ərazisində 1,5 milyon nəfər yaşayacaq.
Konsern rəhbəri vurğulayıb ki, birinci mərhələ başa çatan zaman burada 150 min nəfərin yaşayacağı gözlənilir: "Biz gözləyirik ki, 2016-cı ilin martında kompleks ilk sakinlərini qəbul edəcək. Mənzillərin satışına isə gələn ildən başlanılacaq. Mənzillərin satışı 3 illik möhlət müddətilə həyata keçiriləcək".
Kompelks ərazisində dünyada ən iri ticarət mərkəzi və planetin ən hündür binasının (1050 metr) tikintisi planlaşdırılır. Kompleks süni arxipelaq üzərində tikilir.
