İqtisadi inkişaf naziri Heydər Babayevin başçılıq etdiyi Azərbaycan hökümətinin nümayəndə heyəti Azərbaycan-Almaniya hökümətlərarası danışıqlarının növbəti raundunda iştirak etmək üçün Bonna (Almaniya) yola düşür. İqtisadi İnkişaf Nazirliyindən Trend ə verilən xəbərə görə, danışıqlar, planlaşdırıldıığı kimi, avqustun 14-17-də keçiriləcək.
Almaniyadakı danışıqlarda ikitərəfli iqtisadi əməkdaşlıq məsələləri, imzalanmış texniki və maliyyə müqavilələri çərçivəsində indiki vəziyyət, gələcək layihələrin gerçəkləşdirilməsi perspektivinin müzakirə ediləcəyi planlaşdırılır. Həmçinin 2007-ci il üçün KFW Almaniya yenidənqurma bankı və GTZ Almaniya texniki yardım cəmiyyəti tərəfindən ediləcək maliyyə və texniki yardımın həcminin dəqiqləşdiriləcəyi nəzərdə tutulub.
Danışıqların yekunlarına görə protokol imzalanacaq, digər sənədlərin imzalanması nəzərdə tutulmayıb. Kredit-zəmanət fondunun yaradılması üçün 4 mln. avro məbləğində (3,75 mln. avro fond üçün, 0,25 mln. avro - əlavə tədbirlərə) qrantın ayrılması haqqında müqavilənin imzalanması üçün hələ səlahiyyət verilməyib.
İndiyədək Almaniyanın Azərbaycana göstərdiyi texniki yardımın həcmi 26 mln. avro, maliyyə yardımının həcmi isə -143 mln. avro təşkil edib.
