"Cənub-qərbi Qobustan" müqavilə sahəsinin işlənməsi üzrə layihənin iştirakçısı olan Arawak Energy bildirib ki, ikinci rüb ərzində Azərbaycan, Qazaxıstan və Rusiya layihələri çərçivəsində kapital sərmayələri 13,1 mln. ABŞ dolları təşkil edib və bu, büdcəyə qoyulmuş göstəriciyə uyğundur. Trend xəbər verir ki, bu barədə Arawak Energy şirkətinin press-relizində qeyd olunub.
Sənəddə qeyd olunub ki, 2006-cı ilin dördüncü rübündə yüksək hasilat göstəricilərinə nail olmaq üçün avqust ayında müqavilə sahəsində iki böyük quyuda xüsusi avadanlığın quraşdırılması nəzərdə tutulub. Bundan əlavə, Azərbaycanın Dövlət Neft Şirkətinin (ARDNŞ) Geologiya və geofizika idarəsi tərəfindən yataqda iki və üç ölçülü (2D və 3D) seysmik kəşfiyyatın keçirilməsi nəzərdə tutulub.
ARDNŞ ilə bağlanmış PSA üzrə "Cənub-Qərbi Qobustan"ın işlənməsi ilə GOC əməliyyat şirkəti məşğul olur. GOC şirkətində 80% iştirak payı Commonwealth Gobustan Limited şirkətinə, 20% isə - ARDNŞ-ə məxsusdur. Commonwealth Gobustan Limited şirkətində 37,17% Arawak Energy şirkətinə, 62,83% isə - China National Petroleum Company şirkətlər qrupuna məxsusdur.