Turcas Petroleum şirkəti ARDNŞ-lə müştərək müəssisənin yaradılması ilə bağlı danışıqlara başlayıb. Bu barədə Trend Türkiyə KİV-nə istinadən xəbər verir.
Turcas şirkətinin İstanbul Fond Birjasına göndərdiyi məlumatda deyilir ki, noyabrın 9-da şirkətin İcraiyyə Komitəsində qəbul olunmuş qərara uyğun olaraq, Turcas Petroleum ARDNŞ-lə neft və təbii qazın istehsalı, işlənməsi, o cümlədən yerli və xarici bazarlarda satışı üzrə müştərək müəssisənin yaradılması və əməkdaşlığın genişləndirilməsi ilə bağlı danışıqlara başlayıb. Bundan başqa, emal və neft-kimya obyektlərinin də yaradılması imkanları müzakirə olunur.
ARDNŞ quruda və dənizdə yerləşən yataqlarından neft və qaz hasil edir, xarici tərəfdaşlarla "Azəri-Çıraq-Günəşli" və "Şahdəniz" kimi iri müqavilə sahələrinin işlənməsində iştirak edir, neft və neft məhsullarını dünya bazarlarına ixrac edir, ölkə daxilində yanacaq satışını həyata keçirir, idxal qaz və elektrik enerjisinin dəyərini ödəyir və s. Azərbaycanda ümumi gücü ildə 20 mln tondan çox olan iki NEZ fəaliyyət göstərir.
