Gürcüstan, Tbilisi /müx. Trend N.Kirtsxalia/ ARDNŞ-ın "Neftqaztikinti" tresti Gürcüstanın magistral qaz kəmərinin Qardabani-Navtluqi hissəsinin 30 kilometrlik sahəsinin yenidən qurulması layihəsi çərçivəsində tikinti işlərinə başlayıb. Bu barədə Gürcüstanın Neft və Qaz Korporasiyasından məlumat veriblər.
Hissənin yenidən qurulması qaz paylayıcı sistemin köhnə struktur sxemini bərpa etməyə imkan verəcək.
Layihə çərçivəsində diametri 700 mm olan yeni boru kəməri inşa ediləcək. Azərbaycanın tikinti şirkəti Gürcüstanda bir neçə layihə həyata keçirir. O, artıq magistral qaz kəmərinin şimal hissəsinin 4 sahəsində yenidənqurma işləri aparıb. Gürcüstanda bu işlər "Minilliyin çağırışı - Gürcüstan" layihəsi çərçivəsində maliyyələşdirilir.
