Azərbaycan, Bakı, 14 yanvar /Trend, müxbir S.Babayeva/
Azərbaycanın rabitə və informasiya texnologiyaları naziri Əli Abbasov Estoniya şirkətlərini Azərbaycanda Regional İnnovasiya Zonaları (RİZ) layihəsində iştiraka dəvət edib. Bu gün layihə hökumət tərəfindən nəzərdən keçirilir və 2009-cu ildə realizə oluna bilər.
"Bu, geniş layihədir və bütün sərmayədarlar üçün əlverişli iş şəraiti yaradılacaq", - Azərbaycanın rabitə naziri çərşənbə günü Estoniyanın iqtisadiyyat və kommunikasiya naziri Yuxan Partsın rəhbərlik etdiyi nümayəndə heyəti ilə görüşdə bildirib.
RİZ layihəsi kiçik və orta innovasiya sahibkarlığının inkişafı üçün texnoparkların yaradılması, elektron avadanlıqlar və proqram məhsullarının istehsalı və ixracı üzrə regional bazanın yaradılması, ölkənin əlverişli tranzit informasiya mərkəzinə (Data Centre) çevrilməsi, formalaşan informasiya cəmiyyəti üçün insan ehtiyatlarının hazırlanması və inkişafı, müxtəlif sahələrdə informasiya texnologiyalarının tətbiqini nəzərdə tutur.
Abbasovun sözlərinə görə, RİZ çərçivəsində vergi və gömrük rüsumları tətbiq olunacaq ki, bu da bütün xarici şirkətlər, o cümlədən Estoniya şirkətləri üçün maraqlı ola bilər.
Nazir Azərbaycan və Estoniya şirkətlərinin İT sahəsində layihələri birgə reallaşdırmalarına maraq ifadə edib.
"Aİ ölkələri arasında Estoniya informasiya texnologiyaları üzrə daha qabaqcıldır, biz artıq Tallindən konkret təkliflər almışıq", - Abbasov deyib.
Azərbaycanın Rabitə Nazirliyinin nəzərdən keçirdiyi Estoniya tərəfinin təklifləri elektron hökumət və elektron idarəetmə komponentlərinin realizəsinə toxunur.
"Estoniya bizim üçün həm də ona görə maraqlıdır ki, bu ölkə Avropa standartları üzrə layihələr hazırlamağı bacarır və bunu bizim üçün münasib qiymətə edir", - Abbasov yekunlaşdırıb.
Müəlliflə əlaqə saxlamaq üçün elektron ünvan: с[email protected]
