Azərbaycan, Bakı/ Trend / "Təhsildə İKT-nin tətbiqi ilə bağlı tövsiyələrin hazırlanması" layihəsi çərçivəsində işçi qrupun toplantısında Azərbaycanın təhsil sahəsində IT tətbiqi məsələləri müzakirə olunub. Multimediya Mərkəzi QHT-sinin verdiyi məlumata görə, görüşdə iştirakçılar sənəd layihəsinin hazırlanması istiqamətində müzakirələr aparıblar.
Hazırda ölkənin təhsil sistemində müxtəlif layihələr və Dövlət Proqramları çərçivəsində İKT-nin tətbiqi istiqamətində müəyyən işlər görüldüyü bir məqamda bu cür sənədə ciddi ehtiyac var. Dövlət Proqramları qəbul edilərkən, prioritetlər müəyyənləşdirilərkən bu tip sənədlərin olmaması müəyyən problemlər yaradacaq.
Müzakirələr zamanı təhsildə İKT-nin tətbiqində əsas məqsəd və vəzifələrin, istiqamətlərin, real vəziyyətdən asılı olaraq prioritet sahələrin, maliyyə əsaslarının, gözlənilən nəticələrin və monitorinq sisteminin hazırlanacaq tövsiyələrdə konkret qeyd olunmasının vacibliyi bildirilib.
Təhsildə İKT-nin tətbiqi ilə bağlı ümumi tövsiyələrdən ibarət Layihənin ilkin variantının hazırlanmasında bütün maraqlı tərəflərin iştirakı ilə müzakirəsinin keçirilməsi məqsədəuyğun hesab edilib.
Toplantıda Təhsil Nazirliyinin, İnformasiya Texnologiyaları İnstitutunun, Asiya İnkişaf Bankının "Təhsildə İKT-nin tətbiqi" Layihəsinin, AzNet Layihəsinin və İT şirkətlərinin nümayəndələri, ali və orta məktəb müəllimləri və müstəqil ekspertlər iştirak ediblər.
"Təhsildə İKT- nin tətbiqi ilə bağlı tövsiyələrin hazırlanması" layihəsi "Təhsil Sektorunun İnkişafı Layihəsi" çərçivəsində elan edilən müsabiqə əsasında həyata keçirilir.