Azərbaycan Ombudsman aparatının əməkdaşları sentyabrın 25-də Bakıda müxalifətin icazəsiz mitinqində iştirak etmiş və polis tərəfindən həbs olunmuş şəxslərin saxlanılma şəraitinin monitorinqini keçiriblər. Aparatdan Trend ə verilən məlumata görə, monitorinq Azərbaycanın insan haqları üzrə müvəkkili Elmira Süleymanovanın göstərişi ilə keçirilib.
İcazəsiz mitinqdə iştirak etdiklərinə görə, məhkəmənin qərarına əsasən, Bakı Şəhər Baş Polis İdarəsinin nəzdindəki inzibati qaydada həbs olunanların Saxlanma Məntəqəsinə baxış keçirilib. Nümayəndələr həmin şəxslərlə görüşərək onların saxlanma şəraiti ilə tanış olub, bəzilərinə isə Apellyasiya Məhkəməsinə müraciət etməkdə köməklik göstəriblər.
Həmçinin, bəzi yerlərdə nümayişçiləri dağıtmaq üçün polis işçiləri tərəfindən güc tətbiq edilməsi ilə bağlı şikayətlər daxil olub. Saxlanılan şəxslər saxlanılma şəraiti və onlara qarşı rəftarla bağlı şikayətlərinin olmadığını bildiriblər.