Dünya Bankı Azərbaycana sığorta fəaliyyətini nizamlayan qanun barədə fikrini bildirib. Azərbaycanın maliyyə nazirinin müavini Azər Bayramovun Trend ə verdiyi məlumata görə, Dünya Bankı artıq bu sahədə yardımla bağlı prinsipial razılığını verib.
"Bizdə bu məsələ ilə paralel olaraq Avropa Yenidənqurma və İnkişaf Bankının (AYİB) və Dünya Bankının (DB) bu məsələ ilə paralel məşğul olması ilə əlaqədar bir sıra texniki problemlər yaranıb. Bizdə olan məlumatlara görə, DB artıq bizimlə sığorta qanunvericiliyi sahəsində əməkdaşlıq edəcəyi ilə bağlı qəti qərar qəbul edib. Belə olan halda AYİB digər sahələrdə əməkdaşlıq təklif edəcək. Belə ki, bu sahədə işlər həddən artıq çoxdur. Lakin ən əsas iş qanunvericiliyin təkmilləşdirilməsidir ki, normal qanunvericilik olmadan bütünlükdə bu sistemi inkişaf etdirmək çətindir ", - deyə A.Bayramov bildirib.
Nazir müavinin sözlərinə görə, yeni sığorta fəaliyyəti barədə qanun layihəsi ən yüksək hazırlıq mərhələsindədir. "Sentyabrda ölkəyə DB-nın mütəxəssisləri gələcəklər və onların təkliflərini, bütün bu məsələləri müzakirə etmək və öz fikirlərimizi söyləmək üçün onlar bizə öz rəylərini təqdim edəcəklər ", - deyə A.Bayramov qeyd edib.