Azərbaycan, Bakı, 25 iyul /Trend, müxbir Zülfiyyə Qurbanova/
Fransanın "AXA Group" şirkətinin Azərbaycanda öz törəmə şirkətinin tam səhmlər paketini əldə etməsi gözlənilmir. Bunu Trend-ə şirkətdən deyiblər.
Fransa şirkəti bu il AXA MBASK ASC-də iştirak payını 84 faizdən 90,9 faizədək artırıb.
Şirkətdən qeyd ediblər ki, qalan səhmlər paketinin sahibi olan fiziki şəxs 9,1 faiz iştirak payını özündə saxlamaq niyyətindədir.
AXA MBASK-ın kapitalının artması nəticəsində Fransa səhmdarının payı 8,73 milyon manatdan 14,23 milyon manatadək artıb.
Sığorta şirkətindən bildiriblər ki, AXA MBASK-ın səhmdarlar strukturunda iştirak payının nisbətində dəyişiklik sığorta şirkətinin növbəti səhmlər emissiyasının yerləşdirilməsi nəticəsində baş verib: "Səhmlərin böyük qismi "AXA Group" tərəfindən alınıb".