Azərbaycan, Bakı, 16 sentyabr /Trend, müxbir Hüseyn Vəliyev/
Rabitə və Yüksək Texnologiyalar Nazirliyinin Bakı Telefon Rabitəsi İstehsalat Birliyi (İB) "BakinterNet" dövlət internet servis provayderinin platformasının genişləndirilməsinə başlayıb. Bunu Trend-ə İB-dən deyiblər.
Söhbət rabitə kanallarının buraxılış qabiliyyətinin genişləndirilməsindən, son istifadəçilərə göstərilən xidmətlərin keyfiyyətinin yaxşılaşdırılması məqsədi ilə proqram aparat komplekslərinin tətbiqindən gedir.
İB-dən bildiriblər ki, bu istiqamətdə işləri ilin sonunda başa çatdırmaq planlaşdırılır: "Dövlət provayderinin platformasının yenilənməsi yeni IPv6 protokoluna səlis keçidi həyata keçirməyə də imkan verəcək".
Hazırda dövlət operatoru "Evə optika" prinsipi üzrə genişzolaqlı internet xidmətlərinin genişləndirilməsi ilə bağlı işlər aparır. Bu istiqamətdə işlər Bakının Yasamal, Xətai, Nizami və Nəsimi rayonlarında aparılır.