Azərbaycan, Bakı, 23 avqust /Trend/
Şərq Tərəfdaşlığı ölkələri Ərazi Əməkdaşlıq Proqramı üzrə Azərbaycan-Gürcüstan işçi qrupunun ikinci iclası sentyabr ayında Gəncədə keçiriləcək.
Trend Kəpəz TV-yə istinadən xəbər verir ki, layihə çərçivəsində hər iki ölkənin sərhədyanı rayonlarından olan sahibkarlar, hakimiyyət orqanları və ictimai təşkilatlar iclasa cəlb ediləcək.
Proqramda Azərbaycanı Şəki-Zaqatala və Gəncə-Qazax iqtisadi rayonları təmsil edəcək. Gürcüstan tərəfindən isə proqrama Kvemo-Kartli və Kaxeti regionları daxil edilib. İlkin hesablamalara əsasən, qrantların həcmi 20-250 min avro arasında dəyişəcək. Layihənin dəyəri isə 12,5 milyon avrodur. Qeyd edək ki, işçi qrupunun birinci iclası ötən ilin sonunda Telavidə keçirilib.