Azərbaycan, Bakı, 5 fevral /Trend/
Çərşənbə axşamı elektrik şəbəkələrində baş vermiş qəza bu ilin yayında futbol üzrə dünya çempionatını (DÇ) qəbul edəcək Braziliyanın 11 ştatında altı milyon insanı işıqsız qoyub. Trend-in məlumatına görə, bu barədə Rusiya mətbuatı Latın Amerikası KİV-nə istinadən xəbər yayıb.
Ölkənin elektrik sisteminin milli operatorunun məlumatına görə, qəzaya səbəb qısaqapanma olub. Təxminən bir saatdan sonra nasazlığı aradan qaldırmaq mümkün olub.
Elektrik cərəyanı kəsilmiş ərazilər arasında DÇ-nin oyunlarını qəbul edəcək altı ştat da olub: San-Paulu, Rio-de-Janeyro, Minas-Jerays, Parana, Riu-Qrandi-du-Sul və Matu-Qrossu.
Qeyd edək ki, çox az müddət əvvəl Braziliyanın energetika naziri Edison Loban ölkədə dünya çempionatının keçirildiyi vaxt elektrik enerjisi qıtlığının hiss edilməyəcəyini vəd etmişdi.