Azərbaycan, Bakı, 6 dekabr /Trend, müxbir E.Tariverdiyeva/
ATƏT MQ-nin həmsədri kimi Rusiya Dağlıq Qarabağ münaqişəsi tərəflərini son vaxtlar münaqişə tərəfləri ilə Rusiya Prezidenti Dmitri Medvedevin əlaqələri nəticəsində hazırlanmış təkliflərdən faydalanmağa çağırır. Trend-in məlumatına görə, bu barədə Rusiya XİN rəhbəri Sergey Lavrov Vilnüsdə keçirilən ATƏT XİNŞ-də bildirib.
"Həmin təkliflər bu ilin mayında Dovildə keçirilən ATƏT MQ həmsədr ölkələri prezidentlərinin birgə bəyanatında da dəstəklənib", - Lavrov deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.