Azərbaycan, Bakı /müx. Trend K.Ramazanova/ Bu yaxınlarda Dağlıq Qarabağda keçirilən "prezident seçkiləri" danışıqlar prosesinə əngəl olmamalıdır. Bu sözləri ATƏT-in fəaliyyətdə olan sədri, İspaniya XİN başçısı Miqel Anxel Moratinos deyib.
"ATƏT Dağlıq Qarabağın müstəqilliyini tanımır və ona görə də bu seçklər münaqişənin həllinə təsir etməməlidir" - deyə o vurğulayıb.
Moratinos bir daha ATƏT-in Minsk qrupu həmsədrlərinin Qarabağ nizamlanması istiqamətində göstərdikləri səyləri dəstəkləyib.
İki Cənubi Qafqaz ölkəsi arasındakı münaqişənin başlanması 1988-ci ilə təsadüf edir. Səbəb Ermənistanın Azərbaycana qarşı ərazi iddiası ilə çıxış etməsi olub. 1992-cu ildən Azərbaycan torpaqlarının 20 faizi, konkret olaraq Dağlıq Qarabağ və 7 ətraf rayon Ermənistan silahlı qüvvələrinin işğalı altınndadır. 1994-ci ilin mayında tərəflər atəşkəs haqqında razılaşma əldə ediblər və hələlik ATƏT-in Minsk qrupunun vasitəçiliyi ilə nəticəsiz sülh danışıqları aparılır.