Azərbaycan, Bakı, 27 fevral / Trend , müxbir S.İlhamqızı/ Azərbaycanın siyasi partiyaları hesab edir ki, bu ilin oktyabrında keçiriləcək prezident seçkisində "exit-poll"ları bitərəf təşkilatlar və beynəlxalq qurumlar keçirməlidir.
"Daha yaxşı olardı ki, neytral təşkilatlar, heç bir siyasi tərəfə üstünlük verməyən, nüfuzlu beynəlxalq qurumlar "exit-poll" keçirsinlər"-deyə Azərbaycan Demokrat Partiyasının (ADP) sədri Sərdar Cəlaloğlu Trend ə açıqlamasında bildirib.
Müxalifətçi ADP prezident seçkisində öz namizədi ilə iştirak etməyə qərar verib, partiyanın Ali Məclisi Cəlaloğlunun namizədliyini irəli sürüb.
Cəlaloğlu bildirib ki, prezident seçkisində bütün seçki dairələri və məntəqələrində ADP-nin nümayəndələri müşahidələr aparacaqlar. ADP fərdi şəkildə məntəqədən kənarda səslərin paralel sayılmasını - "exit-poll" keçirmək niyyətində deyil.
Seçkidə öz namizədi ilə iştirak etməyə qərar vermiş digər müxalifət partiyası Müsavat da hesab edir ki, "exit-poll" üçün bitərəf mövqeli şəxslər və təşkilatlar seçilməlidir.
"Yaxşı olardı ki, bütün siyasi partiyaların nümayəndələrindən ibarət "exit-poll" təşkil olunsun. O zaman "exit-poll"un nəticəsinə şübhə yaranmaz və hansısa namizədə üstünlük verilməsi, saxtakarlıq halları baş verməz"-deyə Müsavat Partiyası Məclisinin sədri Sülhəddin Əkbər Trend ə açıqlamasında bildirib.
O əlavə edib ki, Müsavat Partiyası seçkidə maraqlı tərəf olduğuna görə, partiya fərdi şəkildə "exit-poll" təşkil etməyəcək, çünki onun nəticəsi hamı tərəfindən qəbul edilməyə bilər.
Müsavat funksioneri hesab edir ki, nə iqtidarın, nə müxalifətin namizədinə üstünlük verməyən, obyektivliyi ilə seçilən beynəlxalq təşkilatlar da "exit-poll"lar keçirməyə cəlb olunmalıdır.
2005-ci ilin parlament seçkisində ABŞ-ın "Mitofski İnternational" beynəlxalq təşkilatı, ölkə daxilindən "Azad və ədalətli seçkilər uğrunda" əlaqələndirici məşvərət şurası, Seçki Monitorinq Mərkəzi və digər qurumlar "exit-poll" keçirmişdilər. "Mitofski İnternational"ın cavabları MSK-nın elan etdiyi rəsmi nəticələrə çox yaxın olmuş, yerli QHT-lərin nəticələri isə fərqlənmişdi.
