Azərbaycan, Bakı,15may/ Trend ,müxbir C.Babayeva/ Azərbaycanın müxalifət partiyalarının gənclər təşkilatları qeyri-formal "Biz" koalisiyası, Azərbaycanın Gənclər Platforması, Qarabağ Azadlıq Təşkilatının Gənclər Şurası, Müasir Diplomatlar Assosiasiyası mayın 18- də Azərbaycanın Laçın rayonunun işğalı günündə "İsrail-Azərbaycan" dostluq parkının açılışına etiraz edir. Bu barədə onların cümə axşamı günü qəbul etdikləri birgə bəyanatında bildirilib.
İsrailin Azərbaycandakı səfirliyi İsrailin müstəqilliyi günü ilə əlaqədar mayın 8- də "İsrail-Azərbaycan" dostluq parkının açılışını planlaşdırırdı. Parkın açılışı mayın 18-nə təyin olunub.
"Dostluq parkının işğal günündə açılmasını Azərbaycan xalqına, şəhidlərimizin ruhuna hörmətsizlik kimi dəyərləndiririk və tədbirin vaxtının dəyişdirilməsini tələb edirik",- deyə bəyanatda bildirilir.
Azərbaycanın Gənclər Platformasının baş koordinatoru Nurəddin Babayevin bildirdiyinə görə, dostluq parkının açılışı vaxtının dəyişdirilməsi tələbi ilə gənclər təşkilatları adından Azərbaycanın Xarici İşlər Nazirliyi və İsrailin Azərbaycandakı səfirliyinə müraciət təqdim olunub.
"İsrail-Azərbaycan" dostluq parkının açılışına Qarabağ Azadlıq Təşkilatı, Azərbaycanın İslam Partiyası, Azərbaycan Ziyalılar Birliyi, Dini Etiqad və Vicdan Azadlığının Müdafiəsi Mərkəzi də etiraz edir.
Məqalə müəllifi ilə əlaqə saxlamaq üçün ünvan - [email protected]
