Azərbaycan, Bakı, 20 iyul /Trend, müxbir V.Javoronkova/
Son zamanlar ABŞ-ın Rusiyadakı səfirinin müavini işləyən Erik Rubin ABŞ dövlət katibinin köməkçisinin Avropa və Avrasiya məsələləri üzrə yeni müavini təyin olunub. Trend-in məlumatına görə, bu barədə ABŞ-ın Azərbaycandakı səfirliyindən bildirilib. Onun səlahiyyətlərinə Cənubi Qafqaz ölkələrinə, Türkiyəyə, Yunanıstana və Kiprə nəzarət də daxildir.
Diplomat Erik Rubin bu postda Tina Kaydanovu əvəz edib.
Gürcüstan XİN-dən Trend-ə bildirilib ki, Erik Rubin yeni vəzifədə bu günlərdə Vaşinqtonda keçirilən Gürcüstan-Amerika strateji tərəfdaşlıq xartiyası çərçivəsində müdafiə və təhlükəsizlik məsələləri üzrə işçi qrupun görüşündə iştirak edib.
Orada ABŞ müdafiə nazirinin köməkçisi Aleksandr Verşbou da iştirak edib.