"Dağlıq Qarabağ münaqişəsinin sülh yolu ilə nizamlanması prosesində "ölü nöqtədən irəliləmə hiss olunur, lakin Dağlıq Qarabağ münaqişəsinin Brüsseldə həll olunacağını gözləmək axmaqlıq olardı". Trend xəbər verir ki, bu barədə ATƏT-in fəaliyyətdə olan sədri, Belçikanın xarici işlər naziri Karel De Quxt dekabrın 4-də Brüsseldə keçirilən ATƏT ölkələrinin Xarici işlər nazirləri şurasının iki günlük toplantısında bildirib.
ATƏT-in 56 üzv-ölkəsinin xarici işlər nazirlərinin iştirak etdiyi toplantı "dondurulmuş münaqişələr"ə, eləcə də ATƏT-in fəaliyyətinin gələcək səmərəliliyinə həsr olunub.
Nazir qeyd edib ki, Belçika üç istiqamətdə - siyasi-hərbi, iqtisadi-ekoloji və humanitar istiqamətdə balansa nail olmaq istəyir. Karel De Quxt yüngül silah sahəsində tərəqqinin əldə olunduğunu qeyd edib.