Azərbaycan, Bakı / Trend müxbir S.İlhamqızı/ Vətəndaş Həmrəyliyi Partiyası (VHP) müxalifətin yeni ittifaqının yaradılması prosesində və formalaşdırılacaq birlikdə iştirak etməyəcək. Bu barədə VHP sədri Sabir Rüstəmxanlı açıqlama verib.
Klassik Xalq Cəbhəsi Partiyası və digər partiyaların müxalifəti bir araya gətirərək yeni İttifaq yaratmaq təşəbbüsü ilə əlaqədar VHP-yə də müraciət olunub. S.Rüstəmxanlı müraciətlə bağlı təşəbbüskarlara öz mövqeyini açıqladığını deyib: "Bu ittifaqları biz çox görmüşük. Hər dəfə belə birliklərin fəaliyyətinin nəticəsində sonda bütöv müxalifətin ittifaqı dağılıb. Bu qurumların ayrı-ayrı vaxtlarda adları dəyişilərək sayı çoxaldıqca müxalifət bir az da zəifləyib. Ona görə biz bu məsələyə ehtiyatla və əvvəlki təcrübəyə əsaslanaraq yanaşırıq"-deyə S.Rüstəmxanlı qeyd edib. VHP sədrinin fikrincə, müxalifət partiyalarını bir qurumda birləşdirmək təşəbbüsləri adətən kimlərinsə - konkret hansısa partiya liderlərinin mənafeyinə xidmət edib. Ona görə də yeni ittifaq bu kimi köhnə iddiaları təzələmək, hansısa siyasi qüvvənin mövqeyini gücləndirmək məqsədilə yaradılacaqsa, VHP orada təmsil olunmayacaq.
"Mən açıq danışıram və ünvanları da göstərirəm. Ola bilər ki, belə təşəbbüslərdə bəzi iri partiyalar birbaşa özləri iştirakçı deyillər. Amma onların nümayəndələri, yaxud daimi onların yanında olan və buna can atan partiyalar təşəbbüs göstərirlər. VHP bu oyunlarda iştirak etməyəcək" -deyə S.Rüstəmxanlı vurğulayıb.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
