Azərbaycan, Bakı, 17 iyun /Trend/
Azərbaycan Mətbuat Şurasına yeni qəzetlər, jurnal və informasiya agentlikləri üzv qəbul olunublar.
Trend-in məlumatına görə, Mətbuat Şurasının İdarə Heyətinin cümə günü keçirilən iclasında Şura sıralarına yeni üzvlərin qəbulu məsələsinə baxılıb.
İclasda Şuraya bununla əlaqədar müraciət edən kütləvi informasiya vasitələrinin rəhbərləri həmin KİV-lərin fəaliyyəti barədə arayış verib, sualları cavablandırıblar. Müzakirələrdən sonra "İqtisadiyyat" və "Gəncənin səsi" (Gəncə) qəzetləri, "Vision of Azerbaijan" jurnalı, "Salamnews" və "Sosial" İnformasiya Agentlikləri MŞ sıralarına qəbul olunublar.
Mətbuat Şurasına hazırda 105 qəzet, 17 informasiya agentliyi, 21 jurnalist təşkilatı, 19 jurnal, 23 bölgə nəşri üzvdür.