Azərbaycan, Bakı, 24 yanvar /Trend, müxbir İ.İzzət/
Bakıda avtodayanacağın tikintisi zamanı ölümlə nəticələnən uçqun hadisəsi ilə bağlı Cinayət Məcəlləsinin 222.3-cü(tikinti, mədən işlərinin və sair işlərin aparılmasının təhlükəsizlik qaydalarını pozma ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə cinayət işi açılıb. Bu barədə Trend-ə Baş Prokurorluğun mətbuat xidmətindən məlumat verilib.
Məlumata görə, faktla bağlı müvafiq ekspertizalar təyin edilib.
Qeyd edək ki, yanvarın 23-də saat 03:00 radələrində Bakı şəhəri, Nobel prospekti, 15 ünvanında "Azure-Parkinq" şirkəti tərəfindən inşa edilən avtodayanacağın tikintisi zamanı daş hasarın uçması nəticəsində 1983-cü il təvəllüdlü Alıyev Firqət İsmayıl oğlu, 1965-ci il təvəllüdlü Dadaşov Samir Məhərrəm oğlu, 1990-cı il təvəllüdlü Hacıyev Nicat Əlibala oğlu müxtəlif dərəcəli bədən xəsarətləri alıb, 1978-ci il təvəllüdlü Qurbanov Ələsgər Arif oğlu isə aldığı xəsarətlərdən Kliniki Tibbi Mərkəzdə ölüb.
Xətai rayon prokurorluğu və Polis İdarəsinin əməkdaşları tərəfindən hadisə yerinə və meyitə məhkəmə-tibb ekspertinin iştirakı ilə baxış keçirilib və digər prosessual hərəkətlər yerinə yetirilib.
Hazırda cinayət işi üzrə zəruri istintaq tədbirləri davam etdirilir.