Azərbaycan, Bakı, 14 iyun /Trend/
İyunun 15-də Almaniyanın Münhen şəhərində akademik avarçəkmə üzrə Dünya Kubokunun III mərhələsi start götürəcək. Üç gün davam edəcək yarışda Azərbaycanı Nataliya Mustafayeva təmsil edəcək.
Azərbaycan Milli Avarçəkmə Federasiyasından cümə axşamı Trend-ə verilən məlumata görə, Mustafayeva qadınlar arasında 1 nəfərlik qayıqla (W1X) 2000 metr məsafəyə yürüşlərə qatılacaq.
27 yaşlı avarçəkənimiz daha 23 ölkə təmsilçisinə qarşı mübarizə aparacaq. Onlar yarışın ilk günündə 4 yarımqrupda seçmə və təsəlli yürüşlərində çıxış edəcəklər. Ertəsi gün yarımfinal, iyunun 17-də isə final yürüşləri olacaq.
Qeyd edək ki, 2012-ci il London Yay Olimpiya Oyunlarına vəsiqə qazanmış akademik avarçəkənimiz Nataliya Mustafayeva Dünya Kubokunun ilk 2 mərhələsində də mübarizə aparıb. O, I mərhələdə bürünc medal qazanıb, II mərhələdə isə 4-cü yeri tutub.