Daşkənd .Trend
Özbəkistanın HUMO ödəniş sistemi fəaliyyətini regional səviyyədən beynəlxalq səviyyəyə genişləndirməyi və digər ölkələrin ödəniş sistemləri ilə əməkdaşlığı inkişaf etdirməyi planlaşdırır.
Trend-in Daşkənddəki xüsusi müxbirinin verdiyi məlumata görə, bu barədə Silk Road Finance & Technology Forum çərçivəsində çıxış edən HUMO şirkətinin sədri Aleksey Maslov bildirib.
Onun sözlərinə görə, HUMO-nun ilkin məqsədi ödəniş bazarında daha bir yerli iştirakçı yaratmaq deyil, milli bazardan kənara çıxa biləcək bir sistem formalaşdırmaq olub.
“Əvvəldən məqsədimiz ən azı regional səviyyədə fəaliyyət göstərə biləcək bir oyunçu yaratmaq idi. Lakin daha sonra beynəlxalq fəaliyyətə keçmək qərarına gəldik”, – deyə Maslov bildirib.
O qeyd edib ki, HUMO öz yerli kart sisteminə malikdir və eyni zamanda beynəlxalq ödəniş sistemləri, xüsusilə Visa ilə birlikdə kobrendinq kartları buraxır.
“Kobrendinq kartı ölkə daxilində yerli kart kimi, ölkə xaricində isə Visa kartı kimi istifadə oluna bilər. Bu, yerli ödəniş sistemləri üçün tipik məhsuldur”, – deyə o vurğulayıb.
Bununla yanaşı, HUMO regiondakı digər milli ödəniş sistemləri ilə də birbaşa əməkdaşlığı inkişaf etdirir.
“Məsələn, Qırğızıstandakı Elkart kimi bəzi digər yerli ödəniş sistemləri ilə əməkdaşlığımız var. Elkart kartları ölkəmizdə qəbul edilir, bizim kartlarımız isə Qırğızıstanda istifadə olunur. Eyni modeli Qazaxıstan və regionun digər ölkələri ilə də tətbiq edirik”, – deyə Maslov bildirib.
Onun sözlərinə görə, HUMO əməkdaşlıq coğrafiyasını genişləndirməyə davam edəcək və regional, subregional, gələcəkdə isə beynəlxalq ödəniş bazarında mövqeyini gücləndirməyə çalışacaq.
