Astana. Trend:
“Bizim müşahidələrimizə görə, seçici fəallığı kifayət qədər yüksəkdir”.
Bu sözləri Türkiyənin Qazaxıstandakı səfiri Mustafa Kapucu jurnalistlərə açıqlamasında deyib. Bu barədə Trend-in Astanadakı xüsusi müxbiri məlumat verir.
“Hazırda görə bildiyimiz qədər, hər şey sakit və mütəşəkkil şəkildə keçir. Əlbəttə, seçkilərin nəticələrinə əsasən beynəlxalq təşkilatlar öz hesabatlarını açıqlayacaqlar. Lakin bizim müşahidələrimizə görə, seçici fəallığı kifayət qədər yüksəkdir və səsvermə mütəşəkkil şəkildə keçirilir”, – deyə o bildirib.
Kapucu vurğulayıb ki, Qazaxıstanın müstəqilliyini ilk tanıyan ölkə kimi Türkiyə Qazaxıstan müstəqillik əldə etdiyi gündən etibarən ölkədə inkişaf edən demokratik prosesi və daxili hadisələri diqqətlə və məmnuniyyətlə izləyir.
“Biz həmçinin martın 15-də yeni Konstitusiyanın qəbul edilməsi ilə bağlı keçirilən referendumu öz müşahidəçilərimizlə birlikdə izlədik. Bu, Qazaxıstanın siyasi həyatında və ölkədə demokratik proseslərin inkişafında çox mühüm mərhələ oldu”, – səfir bildirib.
O qeyd edib ki, bu seçkilər Kurultay formatında keçirilən ilk seçkilər olacaq.
“Kurultay birgə müzakirə və məsləhətləşmələr yolu ilə idarəetmə deməkdir. Bu, çox qədim türk ənənəsidir. Müasir dövlət sistemində bu ənənəni görmək bizim üçün böyük və simvolik əhəmiyyət daşıyır.
Arzu edirəm ki, bu seçkilər Qazaxıstan xalqına fayda və rifah gətirsin. İnanıram ki, qarşıdakı dövrdə güclü, daha da güclü Qazaxıstan həm Mərkəzi Asiyada iki ölkəmiz arasındakı münasibətlərə, həm də bütün türk dünyasına müsbət təsir göstərəcək”, – Kapucu sözlərini yekunlaşdırıb.
