Bakı. Trend:
Fransanın şimalında yaşayan bir ailə lotereya oyununda 15 milyon avroluq böyük məbləğin qalibi olub.
Bu barədə avqustun 20-də Fransanın Milli Lotereya və Oyunlar Şirkəti məlumat verib.
Bildirilib ki, ailə üzvləri bu məbləği Parisdə təşkilatın baş qərargahında "birlikdə, xoşbəxt və mehriban şəkildə" qəbul ediblər.
Uduş bu yay, iyulun 22-də lotereya oyununda əldə edilib. Nənə 4, 9, 10, 13, 23 rəqəmlərini, həmçinin 7 şans rəqəmini oynayıb. Bu rəqəmlər ailə üçün "simvolik dəyərə" malikdir. Belə ki, 7 rəqəmi nənənin sahib olduğu nəvələrin sayıdır.
Anonim qalmaq istəyən qaliblər uduş məbləğini öz aralarında bölüşəcəklər. Bu, Fransanın şimalında indiyədək lotereyada əldə edilmiş ən böyük uduşdur. Əvvəlki rekord uduş məbləği 13 milyon avro olub və 2009-cu ildə eyni tarixdə – məhz iyulun 22-də qeydə alınıb.
Ailənin hər bir üzvü bu puldan öz arzularını həyata keçirmək – avtomobil və ev almaq, səyahətə çıxmaq üçün istifadə edəcəyini açıqlayıb.
