Bakı. Trend:
2026-cı ilin yanvar-sentyabr aylarında Azərbaycanın vahid xəzinə hesabının qalığının aktiv idarəetməyə verilməsindən dövlət büdcəsinə 46,8 milyon manat faiz gəliri daxil olub.
Bu barədə Maliyyə Nazirliyinin 2026-cı ilin 9 aylıq dövrü üzrə hesabatında bildirilib.
Hesabata əsasən, cari ilin ilk 9 ayında dövlət büdcəsinin gəlirləri 29 milyard 311,8 milyon manat, xərcləri isə 25 milyard 348,2 milyon manat təşkil edib. Bu dövrdə dövlət büdcəsinin gəlirləri ötən ilin müvafiq dövrü ilə müqayisədə 169,4 milyon manat və ya 0,6 faiz, xərcləri isə 680 milyon manat və ya 2,8 faiz artıb.
Dövlət xəzinədarlığı üzrə hesabat dövründə maliyyələşdirilmiş xərclərin faktiki istifadəsinə yönəldilən vəsaitin həcmi 25 milyard 348,2 milyon manat olub. Eyni zamanda, büdcə xərclərinin icrası ilə bağlı ödəniş tapşırıqlarının sayı 984,3 min ədəd təşkil edib.
Hesabatda diqqət çəkən məqamlardan biri də vahid xəzinə hesabında olan vəsaitlərin idarə edilməsindən əlavə gəlir əldə edilməsidir. Belə ki, hesabın qalığının aktiv idarəetməyə verilməsi nəticəsində 46,8 milyon manat faiz gəliri formalaşıb.
Bundan başqa, artıq ödənilmiş vergilərin, o cümlədən əlavə dəyər vergisinin geri qaytarılması istiqamətində də əməliyyatlar aparılıb. Hesabat dövründə ƏDV üzrə 252,9 milyon manat, fiziki və hüquqi şəxslərə qaytarılmış digər vəsaitlər üzrə 254,5 milyon manat, digər vergilər və rüsumlar üzrə isə 1,6 milyon manat məbləğində göstərici qeydə alınıb.
Qeyd edək ki, vahid xəzinə hesabında müvəqqəti sərbəst vəsaitlərin aktiv idarə edilməsi dövlət maliyyə resurslarından daha səmərəli istifadə etməyə və büdcəyə əlavə faiz gəlirləri qazandırmağa imkan verir.
