Bakı.Trend:
Çin Azərbaycanın suverenliyini və ərazi bütövlüyünü, həmçinin 2026–2028-ci illərdə Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) sədrliyini və Şanxay Əməkdaşlıq Təşkilatına (ŞƏT) üzv olmaq istəyini dəstəklədiyini təsdiqləyib.
Trend-in müxbirinin verdiyi məlumata görə, bunu cümə günü Çinin Azərbaycandakı fövqəladə və səlahiyyətli səfiri Lu Mey Bakıda keçirilən brifinqdə bildirib.
Onun sözlərinə görə, iki ölkə arasında qarşılıqlı siyasi etimad daha da möhkəmlənməkdədir. Çin xarici işlər naziri Van İ ilə görüşü zamanı Azərbaycan Prezidenti İlham Əliyev Bakının “Vahid Çin” prinsipinə sadiqliyini və Çin Xalq Respublikasının Sədri Si Cinpinin bir sıra qlobal təşəbbüslərini dəstəklədiyini təsdiqləyib.
Lu Mey qeyd edib ki, Çin tərəfi Azərbaycanın Pekinin əsas maraqlarına toxunan məsələlərdə ardıcıl mövqeyini yüksək qiymətləndirir. O bildirib ki, Çin Azərbaycanın müstəqilliyini, suverenliyini və ərazi bütövlüyünü, eləcə də milli inkişaf yolunu müstəqil müəyyən etmək hüququnu bundan sonra da dəstəkləmək niyyətindədir.
Səfir vurğulayıb ki, hər iki ölkə Qlobal Cənub dövlətləri kimi, Birləşmiş Millətlər Təşkilatı da daxil olmaqla, çoxtərəfli platformalarda əməkdaşlığı genişləndirir, çoxtərəfli əməkdaşlığın gücləndirilməsini və beynəlxalq ədalət prinsiplərinə riayət olunmasını müdafiə edir.
Bundan əlavə, Çin Azərbaycanın 2026–2028-ci illərdə AQEM-ə sədrliyini, eləcə də ŞƏT-ə qoşulmaq istəyini dəstəkləyir.
Qeyd edək ki, Bakıda Çin Kommunist Partiyası Mərkəzi Komitəsinin 20-ci çağırışının Beşinci Plenumunun yekunlarına və Çin-Azərbaycan münasibətlərinin inkişafındakı son tendensiyalara həsr olunmuş brifinq keçirilir.
Tədbir Çinin Azərbaycandakı səfirliyi tərəfindən təşkil olunub.
Çin Kommunist Partiyası Mərkəzi Komitəsinin 20-ci çağırışının Beşinci Plenumu ölkənin sosial-iqtisadi inkişafının strateji istiqamətlərinin müəyyənləşdirilməsi baxımından mühüm əhəmiyyət daşıyır. Pekinin müxtəlif ölkələrlə iqtisadi və siyasi əlaqələrini genişləndirdiyi bir şəraitdə plenumun yekunları Çinin beynəlxalq tərəfdaşları üçün də maraq doğurur.
Son illərdə Azərbaycan və Çin ticarət-iqtisadiyyat, investisiya, nəqliyyat və enerji sahələrində əməkdaşlığı fəallaşdırıblar. İkitərəfli gündəlikdə, xüsusilə Orta Dəhliz çərçivəsində nəqliyyat əlaqələrinin inkişafı mühüm yer tutur. Bu dəhliz Çin üçün Mərkəzi Asiya və Cənubi Qafqaz vasitəsilə Avropa bazarlarına çıxış imkanı yaradır.
Brifinq Azərbaycan və Çin arasında strateji tərəfdaşlığın möhkəmləndiyi, eləcə də “Bir kəmər, bir yol” təşəbbüsü çərçivəsində əməkdaşlığın genişləndiyi bir vaxtda keçirilir.
