Astana.Trend:
Qazaxıstanda Qurultaya deputat seçkilərinin hazırlanmasını və keçirilməsini yüksək qiymətləndiririk.
Trend-in xüsusi müxbirinin verdiyi məlumata görə, bunu Rusiyanın Mərkəzi Seçki Komissiyasının (MSK) üzvü Alyona Bulqakova jurnalistlərə müsahibəsində deyib.
“Hər bir seçicinin öz iradəsini ifadə etmək və bunu şüurlu şəkildə etmək imkanı olub. Bununla əlaqədar olaraq, seçki prosesinin təşkili üçün görülən tədbirlərə Qazaxıstan Respublikasının qanunvericiliyinə və seçki prosesinin beynəlxalq standartlarına uyğun şəkildə əməl edilib”, - deyə o bildirib.
Bulqakova seçki prosesinin açıqlıq, şəffaflıq və aşkarlıq səviyyəsini də qeyd edib.
“Seçki prosesindəki açıqlıq, şəffaflıq və aşkarlıq səviyyəsinə də diqqət yetirmək vacibdir. Çünki bütün seçki məntəqələrində həm partiyaların müşahidəçiləri, həm də birbaşa müstəqil müşahidəçilər iştirak ediblər”, - deyə o bildirib.
O vurğulayıb ki, seçki prosesi bütün standartlara uyğundur və beynəlxalq müşahidəçilər tərəfindən də yüksək qiymətləndirilir.
“Qazaxıstan Respublikasının Mərkəzi Seçki Komissiyasının bu gün açıqladığı seçici fəallığı özü hər şeyi deyir. Çünki seçicilər prosesə etimad göstərir, şüurlu şəkildə iştirak edir və özləri, övladları üçün layiqli gələcəyi və respublikanın çiçəklənməsini təmin etmək məqsədilə seçimlərini edirlər”, - deyə o bildirib.
Bulqakova inklüziv təcrübələrə də əməl olunduğunu qeyd edib. O bildirib ki, bütün seçki məntəqələrində sağlamlıq imkanları məhdud şəxslərin öz iradələrini ifadə etmələri üçün imkanlar yaradılıb.
