Azərbaycan, Bakı, 08 avqust / Trend , müxbir N.İsmayılova /
Latviya Prezidenti Valdis Zatlersin avqustun 10-da Azərbaycana səfəri çərçivəsində iqtisadiyyatın müxtəlif sahələrində əməkdaşlıq perspektivlərinin müzakirəsi məqsədilə bir sıra dəyirmi masaların keçirilməsi planlaşdırılıb. Bu barədə şənbə günü ölkənin İqtisadi İnkişaf Nazirliyindən bildirilib.
Bazar ertəsi Naxçıvan Muxtar Respublikasının investisiya imkanlarının, təhsil, turizm, maliyyə sektoru və İKT sahəsində əməkdaşlıq perspektivinin müzakirəsi üçün dəyirmi masa təşkil ediləcək. Maliyyə sektoru üzrə müzakirələr Azərbaycan İnvestisiya Şirkətində, İKT üzrə müzakirələr isə Rabitə və İnformasiya Texnologiyaları Nazirliyində keçiriləcək.
Tədbirlərin təşkilatçıları Azərbaycan İqtisadi İnkişaf Nazirliyi, Azərbaycanın İxrac və İnvestisiyaların Təşviqi Fondu və Latviyanın Azərbaycandakı səfirliyidir.
Latviyanın nümayəndə heyətinin tərkibində hökumət nümayəndələri və azərbaycanlı həmkarları ilə əməkdaşlığın genişləndirilməsi imkanlarını müzakirə etmək niyyətində olan latviyalı biznesmenlər qrupu olacaq.
Azərbaycanın Dövlət Statistika Komitəsinin məlumatına görə, 2008-ci ilin yekunlarına əsasən, Azərbaycan və Latviya arasında əmtəə mübadiləsi ixrac-idxal əməliyyatları üzrə ötən ilki göstəriciyə nisbətən 47,6 faiz artaraq 7,86 milyon dollar təşkil edib.
Məqalə müəllifi ilə əlaqə ünvanı: [email protected]
