Azərbaycan, Bakı, 07 oktyabr / Trend , müxbir İ.Xəlilov/
"Agrarcredit" təşkilatının İdarə Heyətinin sədri Yusif Vəliyevin verdiyi məlumata görə, qeyri-bank kredit təşkilatının kənd təsərrüfatı bankına transformasiyası ilə bağlı Azərbaycan hökumətinə təklif təqdim olunub.
O deyib ki, "Agrarcredit" təşkilatının banka çevrilməsi təklifi İqtisadi İnkişaf Nazirliyi tərəfindən təklif olunub. "Bu gün ölkə regionlarının inkişafı üçün kənd təsərrüfatına böyük sərmayə qoyuluşları olmalıdır ki, bu da öz növbəsində kənd əhalisinin paytaxta axınının qarşısını alacaq", - Vəliyev deyib.
Onun sözlərinə görə, əvvəlcə dövlət bankı yaradılacaq, daha sonra isə onun özəlləşdirilməsi gözlənilir.
Yeni bankın kapitalının 50 faizinin xarici investorlara məxsus olacağı bildirilmişdi. Qalan 50 faiz isə hərəyə 25 faiz olmaqla yerli özəl və dövlət sektorları arasında bölüşdürüləcək. Daha sonra bankın dövlətə aid səhmi də özəlləşdiriləcək.
Dünya böhranının dərinləşməsinə qədər Avropa Yenidənqurma və İnkişaf Bankı kənd təsərrüfatı bankının aksiyalarının 25 faiz+1 paketini almağa maraq göstərirdi. Almaniyanın KfW İnkişaf Bankı tərəfindən də buna maraq var idi. "Agrarcredit"-dən verilən məlumata görə, bu maliyyə institutları ilə məsləhətləşmələr müvəqqəti olaraq dayandırılıb.
Hazırda kredit təşkilatı məhdud lisenziya ilə fəaliyyət göstərir, sərmayəsi 18,5 milyon manat təşkil edir. Təşkilatın gələcək kapitallaşdırılması məsələsini səhmdarlar həll edəcəklər.
Təşkilatın aktivləri 25 milyon manat, kredit portfeli isə 16 milyon manat təşkil edir.
Ölkə hakimiyyəti maliyyə resusrslarında tələbatı 1,2-1,3 milyard dollar olan aqrar sektorunun inkişafında maraqlıdır. Buna görə də kənd təsərrüfatı bankının yaradılmasının qaçılmaz olduğunu anlayır.
"Agrarcredit"-in əsas səhmdarı 99,9 faiz səhmə malik olan Azərbaycan Maliyyə Nazirliyidir. Qalan hissə isə bərabər olaraq "Azərsığorta" dövlət sığorta şirkəti ilə "Meliorasiya və Su Təsərrüfatı" ASC arasında paylaşdırılır.
Məqalə müəllifi ilə əlaqə ünvanı: [email protected]
