Azərbaycan, Bakı, 26 oktyabr /Trend, müxbir N.İsmayılova/
Azərbaycan Dövlət Statistika Komitəsi hazırda sahibkarlardan hesabatları həm kağız, həm də elektron formada alır. Bunu Dövlət Statistika Komitəsinin sədri Arif Vəliyev çərşənbə axşamı mətbuat konfransında bildirib.
"Çətinlik ondadır ki, sahibkarların hamısı statistik hesabatların elektron formada verilməsi imkanına malik deyillər. Gələn ildən hesabatları elektron formada göndərən sahibkarlar onların surətlərini kağız formada göndərməyəcəklər", - Vəliyev bildirib.
Onun sözlərinə görə, Dövlət Statistika Komitəsi regionlardan məlumatları istisnasız olaraq elektron formada alır.
"Bu gün rayonların statistika idarələrindən hesabatların hamısı elektron formada daxil olur", - Komitə sədri deyib.
