Azərbaycan, Bakı, 10 iyun /Trend, müxbir A.Axundov/
Xarici sığortaçılar Azərbaycanın sığorta sektorunun investisiya cəlbediciliyini yüksək qiymətləndirirlər. Bu, İstanbuldakı beynəlxalq sığorta konfransında qeyd olunub. Azərbaycan Sığortaçılar Assosiasiyasının icraçı direktoru Azər Əliyevin fikrincə, Azərbaycanın sığorta bazarı xarici investorlar üçün hər şeydən əvvəl, bu gün inkişaf etməməsi ilə cəlbedicidir.
"Lakin bununla yanaşı, bu bazar stabil iqtisadi inkişafa yardım edən müəyyən təbii resurslar, artım tendensiyasına malik doqquz milyonluq əhali, eləcə də əlverişli coğrafi yerləşməsi sayəsində nəhəng potensiala malikdir. Bu, bir növ yalnız düzgün əkilməsi lazım gələn xam torpaqdır, məhsul isə özünü çox gözlətməyəcək", - Əliyev bildirib.
Onun sözlərinə görə, Azərbaycan bazarı xarici sığortaçılar üçün həm də öz qiyməti ilə cəlbedicidir.
"Sığorta sahəsində qlobal dünya oyunçuları üçün bu mərhələdə bizim bazarımıza daxil olmaq nisbətən ucuz başa gələcək. Şığorta şirkətlərinin özlərinin qiyməti, eləcə də onların inkişafı üçün tələb olunan investisiyalar inkişaf etmiş bazarlardakından dəfələrlə az olacaq. Əvəzində isə xeyir xeyli çox olacaq", - Əliyev bildirib.
Bir müddət əvvəl Azərbaycan Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilovun dediyi kimi, yaxın 2-3 ildə Azərbaycanın sığorta bazarına digər iri beynəlxalq şirkətlərin daxil olmasına marağın artmasını gözləmək olar.
"2008-ci ilədək Azərbaycanın sığorta bazarına böyük maraq var idi və bəzi şirkətlər artıq ilkin danışıqlar aparırdılar, lakin dünya maliyyə böhranı ilə əlaqədar olaraq real maraq göstərən əksər şirkətlərdə öz gələcək investisiya planlarını təxirə salmağa məcbur edən müəyyən problemlər yarandı", - Xəlilov qeyd edib.
Dövlət Sığorta Nəzarəti Xidmətinin rəhbəri hesab edir ki, 2008-ci ilin martında qüvvədə olan "Sığorta fəaliyyəti haqqında" qanuna uyğun olaraq, Azərbaycanın sığorta şirkətlərində xarici kapitalın iştirakına qoyulan məhdudiyyətin ləğvi Azərbaycanın sığorta bazarının investisiya cəlbediciliyini artırmağa imkan verib.
"Bunun bariz nümunəsi Fransanın AXA şirkətinin ötən il ölkənin sığorta bazarına gəlməsidir. Əminəm ki, artıq yaxın illərdə biz başqa xarici sığortaçıların da Azərbaycana yüksək marağını görəcəyik", - Xəlilov əlavə edib.
Onun fikrincə, Azərbaycanın sığorta bazarına aparıcı beynəlxalq sığortaçıların gəlişi sözsüz ki, onun inkişafına müsbət təsir göstərəcək. Başlıcası odur ki, bu şirkətlər dünyanın onlarla ölkəsində uzun illər boyunca topladıqları təcrübəni də gətirirlər.
Hazırda ölkədə 28 sığorta şirkəti (o cümlədən beş xarici kapitalın iştirakı ilə), bir təkrar sığorta və altı broker şirkəti (o cümlədən beş xarici kapitalın iştirakı ilə) fəaliyyət göstərir.
Birinci rübdə ölkədə fəaliyyət göstərən bütün şirkətlərin sığorta haqları 49,129 milyon manat (9,9 faiz artım) təşkil edib. Bu müddət ərzində isə 12,975 milyon manat məbləğində (26 faiz artım) ödənişlər edilib.
İyunun 10-na olan rəsmi məzənnə 0,7884 AZN/USD təşkil edir.
