Mayın 24-26-da Bakıda Heydər Əliyev adına idman-konsert kompleksində keçiriləcək "Qida sənayesi" 12-ci Azərbaycan beynəlxalq sərgisində (Interfood Azerbaijan 2006) 20 azərbaycan şirkəti iştirak edəcək. Bunun 12-si istehsalçı şirkətdir. Trend in xəbər verdiyi kimi, bu barədə mayın 23-də Iteca Caspian şirkətinin sərgi üzrə meneceri Mayya Qafarlı bildirib.
Onun sözlərinə görə, sərginin iştirakçısı olan 13 ölkədən 61 şirkətin 40-a yaxını Türkiyə, Almaniya, İtaliya, Polşa, Şri-Lanka, Hindistan və digər ölkələrin istehsalçı şirkətləridir.
"Ötən illə müqayisədə ekspozisiyanın sahəsi 30% artıb", -deyə menecer qeyd edib.
Sərginin əsas bölmələri qida məhsulları, spirtli və spirtsiz içkilər, dondurulmuş məhsullar və yarımfabrikatlar, kənd təsərrüfatı və bağçılıq avadanlıqları və s-dir.
Sərgi Kənd Təsərrüfatı Nazirliyi, İqtisadi İnkişaf Nazirliyi, Ticarət-Sənaye Palatası, İxracın Təşviqi və İnvestisiya Fondu, Azərbaycan Sahibkarlar Konfederasiyası və TUSİAB-ın dəstəyi ilə keçirilir. Interfood Azerbaijan 2006 sərgisinin baş sponsoru Azersun holdingdir.