2006-cı ilin yanvar-sentyabr aylarında Azərbaycanda 1402,6 mln. manatlıq inşa işləri həyata keçirilib ki, bu da 2005-ci ildəki eyni göstərici ilə müqayisədə 24,9 % çoxdur. Trend in Dövlət Statistika Komitəsinə istinadən xəbər verdiyi kimi, tikinti sahəsində göstərilən xidmətlərin ümumi həcmindən 258,6 mln. manatlıq işlər dövlət müəssisələri, 1144 mln. manatlıq isə özəl müəssisələri tərəfindən görülüb.
İnşa işlərinin ümumi həcminin 79,5 %-i və ya 1115 mln. manatı yeni tikililərin, bərpaolunma və genişləndirmənin, 11,5 %-i və ya 162,2 mln. manatı əsaslı təmirin, 4,4 %-i və ya 61,4 mln. manatı cari təmir işləri, 4,6 %-i və ya 64 mln. manat isə digər inşa işlərinin payına düşür.
2006-cı ilin 8 ayı ərzində tikinti sahəsində işləyənlərin orta nominal əmək haqqı 303,2 manat təşkil edib ki, bu da 2005-ci ilin eyni dövrü ilə müqayisədə 18,2% çoxdur.
