Azərbaycan,Bakı/müxbir Trend İ.Xəlilova/ "Zygon Caspian Consulting" (ZCC) konsaltinq şirkəti sayca üçüncü bankla - "ƏmrahBank"la ISO 9001-2000 idarəetmə sisteminin keyfiyyət standartlarının tətbiqi ilə bağlı müqavilə imzalayıb. Bu barədə şirkətin direktoru Natiq Ağazadə məlumat verib.
Şirkətin mütəxəssisləri mayın 2-dən etibarən konsultasiya xidmətlərinə başlayır. Xidmətlər 7-8 ay ərzində davam etdiriləcək.
Bu gün Azərbaycanda artıq 5 bank bu standartları tətbiq edib: "TexnikaBank", "Bank Respublika", "Uni Bank", "Bank of Azerbaijan" və "AtaBank". "TexnikaBank" və "Bank of Azerbaijan"-a konsultasiya xidmətlərini ZCC təqdim edib.
" Keçən il bu standartların tətbiqi "TexnikaBank"a Qara Dəniz Ticarət və İnkişaf Bankından kredit xəttinin cəlb olunmasının əsasını təşkil edib və bu, prosesi sürətləndirib" - deyə Ağazadə bildirib.
Ölkənin ən böyük bankı Azərbaycan Beynəlxalq Bankına gəlincə, o, ISO beynəlxalq standartlarını tətbiq etməyə özünün törəmə şirkətlərindən başlayıb. ZCC-nin təşəbbüsü ilə Beynəlxalq Sığorta Şirkəti artıq ISO 9001:2000 sertifikatını alıb.
