Azərbaycan, Bakı, 19 oktyabr /Trend, müxbir N.İsmayılov/
"Amec-Tekfen-Azfen" (ATA) alyansı "Chirag oil project" ("Azəri-Çıraq-Günəşli yatağında hasilatın artırılması) çərçivəsində platformalar üçün üst quruluşların (topside) elementlərinin və qazma obyektləri montajı üzrə işə başalyıb. Bu barədə çərşənbə axşamı neft-qaz bazarındakı mənbə deyib.
"Əvvəl hazırlanmış tədarüklərin montajı üzrə işlərə artıq başlanılıb. Xüsusilə, korpus və buruq obyektlərinin montajı üzrə işlər aparılır", - mənbə bildirib.
Onun sözlərinə görə, həmçinin, eyni zamanda, layihə çərçivəsində tikinti üçün lazım olan başqa elementlərin tədarükü üzrə də işlər davam etdirilir.
Bundan əvvəl mənbənin dediyi kimi, platforma üçün üst quruluşların və buruq obyektlərinin tikinti prosesinə 2,5-il vaxt apaarcaq. Tikintinin prosesi iki mərhələdən ibarətdir. Birinci mərhələ - lazımlı elementlərin istehsalı, ikincisi - onların montajıdır. Lazımlı elementlər mərhələlərlə hazırlanacaq, bundan sonra onlar tədricən montaj ediləcək.
Azərbaycan Beynəlxalq Əməliyyat Şirkəti (АМОК) ilə müqaviləyə əsasən, AMЕK/Tekfen/Azfen (ATA) konsorsiumu üst modulların, buruq obyektlərinin tikintisi, eləcə də yığım, tənzimləmə və istismar sınaqları üzrə işləri görəcək. Bu müqavilənin dəyəri təxminən 340 milyon dollar təşkil edir.
"Azəri-Çıraq-Günəşli" yataqların işlənməsinin layihəsi çərçivəsində ATA artıq texnologiya platformalarından birinin üst quruluşlarının qurulması ilə məşğul olub.
"Chirag oil project" dənizin 170 metr dərinliyində qurulacaq yeni platformada "Qərbi Çıraq"ın tikintisini nəzərdə tutur.
"Chirag oil project" çərçivəsində tikinti işlərinin əksəriyyəti, o cümlədən, əvvəlki layihələr üçün xaricdə tikilən platformanın buruq modulunun tikintisi Azərbaycanda həyata keçiriləcək.
"Chirag oil project" altı milyard dollar həcmində investisiyanı nəzərdə tutur.
AÇG-də neft hasilatının artırılması çərçivəsində tikiləcək yeni platformadan Azeri Light növlü neft hasilatının planlaşdırılan sutkalıq həcmi 183 min barel təşkil edəcək. Yeni platformadan səmt qazının gözlənilən sutkalıq həcmi 6,5 milyon kubmetri ötəcək.
Layihə çərçivəsində qabaqlayıcı qazma 2010-cu ilin birinci yarısını, 2012-ci ilin ikinci yarısını əhatə edəcək. Bu dövrdə qabaqlayıcı qazmanı "Dədə Qorqud" qurğusu aparacaq. Platformadan hasilatın 2013-cü ilin sonunda başlanmaq planlaşdırılıb.
Layihənin reallaşdırılması çərçivəsində 300 milyon barel neftin hasil edilməsi planlaşdırılır.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoil" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).
