Azərbaycan, Bakı, 22 avqust /Trend, müxbir E.İsmayılov/
"Chirag oil project" layihəsinin ("Azəri-Çıraq-Günəşli" yataqlar blokunda neft hasilatının artırılması) reallaşdırılması üçün qabaqlayıcı qazma proqramı çərçivəsində 16 quyudan üçündə qazma və konservasiya işləri başa çatıb. Bu barədə BP-nin ilin birinci yarısı üzrə rəsmi hesabatında deyilir.
"Bu proqram çərçivəsində J03, J-04 və J06 quyuları 13-3/8 düyümlük ölçüdə qoruyucu borularadək qazılıb və gələcəkdə istifadə üçün bağlanıb", - hesabatda deyilir.
Proqramın reallaşdırılmasına ötən ilin aprelində başlanıb. Proqramın reallaşdırılmasında istifadə olunan "Dədə Qorqud" qazma qurğusunun modernləşdirilməsi və sertifikatlaşma prosesindən keçməsindən sonra işlər bu ilin iyulunda bərpa olunub.
Hesabatda deyildiyi kimi, hazırki plana görə, daha beş əlavə quyunun qazılmasından sonra qazma əməliyyatı başa çatacaq, bundan sonra dənizdə "Qərbi Çıraq" platforması quraşdırılacaq.
"Chirag oil project" dənizin 170 metr dərinliyində qurulacaq yeni platformada "Qərbi Çırağ"ın tikintisini nəzərdə tutur.
"Chirag oil project" çərçivəsində tikinti işlərinin əksəriyyəti, o cümlədən əvvəlki layihələr üçün xaricdə tikilən platformanın buruq modulunun tikintisi Azərbaycanda həyata keçiriləcək.
"Chirag oil project" altı milyard dollar həcmində investisiyanı nəzərdə tutur.
AÇG-də neft hasilatının artırılması çərçivəsində tikiləcək yeni platformadan "Azeri Light" növlü neft hasilatının planlaşdırılan sutkalıq həcmi 183 min barel təşkil edəcək. Yeni platformadan səmt qazının gözlənilən sutkalıq həcmi 6,5 milyon kubmetri ötəcək.
Layihə çərçivəsində qabaqlayıcı qazma 2010-cu ilin birinci və 2012-ci ilin ikinci yarısını əhatə edəcək. Bu dövrdə qabaqlayıcı qazmanı "Dədə Qorqud" qurğusu aparacaq. Platformadan hasilata 2013-cü ilin sonunda başlamaq planlaşdırılıb.
Layihənin həyata keçirilməsi çərçivəsində 300 milyon barel neft hasilatı planlaşdırılır.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 35,83 faiz iştirak payı), "Chevron" (11,27 faiz), AzACG (11,6 faiz), INPEX (10,96 faiz), "Statoil" (8,56 faiz), "ExxonMobil" (8 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).
