Bakı. Trend:
"Suriya Demokratik Qüvvələri"nin (SDQ) adı altında faəliyyət göstərən PKK/YPG tertəxminən 450 döyüşçüsü Suriya keçid hökuməti ilə əldə olunan razılaşmaya əsasən, cümə günü Suriyanın şimalında Hələb şəhərinin Əşrəfiyə və Şeyx Məqsud bölgələrini tərk edib.
Trend-in məlumatına görə, bu barədə "Al Arabiya" televiziya kanalı mənbələrə istinadən xəbər verib.
Məlumata əsasən, təxliyə edilən ilk qrupun tərkibində 450-yə yaxın SDQ döyüşçüsü Hələbi tərk edib. Razılaşmada Əşrəfiyə və Şeyx Məqsud bölgələrində qalan birləşmələrinin ictimai təhlükəsizlik qüvvələrinin tərkibinə daxil edilməsi nəzərdə tutulur.
Bundan əlavə, əldə olunan razılaşmalara əsasən, SDQ-nin 170 nümayəndəsi və Suriya təhlükəsizlik qüvvələri arasından 400-ə yaxın məhbus həbsxanalardan azad ediləcək. Onların bəziləri artıq ötən günlərdə azadlığa buraxılıb.