Bakı. Trend:
Daxili İşlər Nazirliyinin Mətbuat Xidmətinin Şirvan regional qrupundan verilən məlumata görə, Ucar Rayon Polis Şöbəsinin əməkdaşlarının keçirdiyi əməliyyat-axtarış tədbirləri nəticəsində rabitə dirəklərindən ümumi dəyəri 10 000 manata yaxın olan TPP tipli kabel oğurlayan rayon sakinləri Vüsal Fərzəliyev, Nicat Cəfərov və Sənan Cəfərov saxlanılıblar.
Trend xəbər verir ki, araşdırma zamanı məlum olub ki, həmin şəxslər noyabr-dekabr ayları ərzində Ucar şəhəri və üç kəndin ərazisində olan rabitə dirəklərindən 2400 metrdən artıq kommunikasiya kabellərini kəsərək, tərkibindəki əlvan metalları metal qəbulu məntəqələrinə satıblar və əldə etdikləri pulları öz aralarında bölüşüblər.
Faktla bağlı Ucar RPŞ-nin İstintaq Bölməsində cinayət işi başlanıb. Vüsal Fərzəliyev, Nicat Cəfərov və Sənan Cəfərovun digər analoji faktlarda iştirakının olub-olmaması araşdırılır.