Bakı. Trend:
Amerika Kino Sənəti Akademiyası çərşənbə axşamı 10 kateqoriya üzrə Oskar mükafatına namizədlərin qısa siyahısını açıqlayıb.
Trend xəbər verir ki, “Ən yaxşı xarici bədii film” nominasiyasında 15 film mübarizə aparacaq. Bu filmlər arasında braziliyalı rejissor Valter Sallesin “Mən hələ də buradayam” (I'm Still Here), fransız Jak Audiardın “Emilia Peres” (Emilia Pérez), danimarkalı rejissor Maqnus fon Hornun “İynəli qız” (The Girl with the Needle), çex rejissoru irji Madlanın "Dalğalar" (Waves) və islandiyalı Baltasar Kormakurun "Təmas" (Touch) əsərləri də yer alır. Həmçinin Böyük Britaniya, Almaniya, İtaliya, Kanada, Latviya, Norveç, Fələstin və Taylanddan olan digər filmlər də bu nominasiyada mübarizə aparacaq.
“Ən yaxşı musiqi” nominasiyasına “Çallengerlər” (Challengers), “Konklav” (Conclave), “Vəhşi robot” (The Wild Robot), “Beetlejuice Beetlejuice” və “Inside Out 2” kimi filmlər daxildir. "Ən yaxşı sənədli film" kateqoriyasına isə “Qara qutu gündəlikləri” (Black Box Diaries), “Dahomey”, “Frida”, “Hollywoodqeyt” (Hollywoodgate) və “Porcelan müharibəsi” (Porcelain War) daxil olub.
Bundan əlavə, digər nominasiyalar üzrə də qısa siyahılar təqdim edilib: “Ən yaxşı qısametrajlı sənədli film”, “Ən yaxşı makiyaj və saç düzümü”, “Ən yaxşı mahnı”, “Ən yaxşı qısametrajlı cizgi filmi”, “Ən yaxşı qısametrajlı film”, “Ən yaxşı səs” və “Ən yaxşı vizual effektlər”.
97-ci Akademiya Mükafatları 2 mart 2025-ci ildə keçiriləcək. Tədbiri amerikalı komediyaçı Konan O'Brayen aparacaq.