Azərbaycan, Bakı, 26 avqust / Trend , müxbir A.Hüseynbala /
Azərbaycanın bir qrup müxalifət partiyasının təmsil olunduğu ittifaqın Dağlıq Qarabağ münaqişəsinin nizamlanması üçün təklif edilən Madrid prinsiplərinə etiraz olaraq keçirmək istədiyi aksiyalara hazırlıqla bağlı məsləhətləşmələr davam edir.
"Müsavat Partiyasının başqanı İsa Qəmbərlə bugünkü görüşümdə aksiyaların nə dərəcədə zəruri olub-olmadığını müzakirə etmişəm", - çərşənbə günü Trend -a Demokratiya Uğrunda İttifaqda (DUİ) təmsil olunan Azadlıq Partiyasının sədri Əhməd Oruc bildirib.
Trend -un arayışı: İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının 20 faizi, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Orucun sözlərinə görə, Müsavat başqanı da partiyasının Madrid prinsiplərinin əleyhinə olduğunu deyib.
"Qəmbərin fikrincə, Madrid prinsipləri qəbul olunarsa, Azərbaycan Dağlıq Qarabağın tamamilə itirilməsi təhlükəsi ilə üzləşə bilər. Müsavat başqanı partiyaların aksiyalara hazırlaşmasından öncə cəmiyyətin bu prinsiplərə etirazına nail olmağı əhəmiyyətli hesab edir", - partiya sədri əlavə edib.
DUİ təmsilçisi deyib ki, Qəmbər aksiyalarla bağlı məsləhətləşmələrin davam etdirilməsinin də tərəfdarıdır. "Lakin Müsavat başqanı etiraz aksiyalarının bizim təklif etdiyimiz vaxtda keçirilməsini məqbul hesab etmir. Qəmbərin fikrincə, Azərbaycan hakimiyyətinin Madrid prinsipləri ilə bağlı qəti mövqeyi açıqlanmayana qədər etiraz aksiyalarının keçirilməsi məqsədəuyğun deyil", - Oruc vurğulayıb.
Azadlıq Partiyası sədrinin sözlərinə görə, DUİ-nin təşəbbüsü ilə keçirilən Qarabağ forumlarında iştirak edən siyasi qüvvələrin əksəriyyəti isə Madrid prinsiplərinin əleyhinə yönələcək piket və digər aksiyaların təşkil olunmasını dəstəkləyirlər. "DUİ-də təmsil olunmayan müxalifət partiyaları təşəbbüsümüzü dəstəkləməsə də, biz yaxın zamanlarda öncə piket, sonra isə mitinqlərin keçirilməsi barədə qərar qəbul edəcəyik", - Oruc qeyd edib.
Demokratiya Uğrunda İttifaqda təmsil olunan partiyalar bir müddət öncə ATƏT-in Minsk qrupunun həmsədrlərinin Dağlıq Qarabağ münaqişəsinin nizamlanması ilə bağlı təklif etdiyi Madrid prinsiplərinə etiraz olaraq müxalifətin birgə kütləvi etiraz aksiyalarının keçirilməsi təşəbbüsü ilə çıxış ediblər. Bu məqsədlə yaradılan işçi qrupunun üzvləri hazırda müxalifət partiyalarının rəhbərləri ilə görüşərək təşəbbüsün dəstəklənməsi üçün məsləhətləşmələr aparırlar.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassik Xalq Cəbhəsi, Azadlıq və Milli Demokratiya partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq Pаrtiyаsı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur.
Məqalə müəllifi ilə əlaqə ünvanı: [email protected]
