Bakı. Trend:
Almaniya hökuməti Çinə qarşı ticarət siyasətini, o cümlədən enerji və xammal idxalını, eləcə də Pekinin Berlinin strateji infrastrukturuna investisiyalarını yenidən qiymətləndirmək məqsədilə parlamentə hesabat verəcək ekspert komitəsi yaratmağı planlaşdırır.
Trend xəbər verir ki, bu addım dünyanın ikinci və üçüncü ən böyük iqtisadiyyatları arasında artan ticarət gərginliyi ilə bağlıdır. Kansler Fridrix Mertsin rəhbərlik etdiyi mühafizəkarlar və koalisiya tərəfdaşları olan sosial demokratlar tərəfindən hazırlanan sənədə görə, komitə Almaniya və Çin arasında milli təhlükəsizlik üçün əhəmiyyətli olan ticarət münasibətlərini təhlil edəcək və hökumətə tövsiyələr təqdim edəcək.
Təşəbbüsün gələn cümə təsdiqlənəcəyi gözlənilir. Bundan sonra təxminən 12 ekspertdən – alimlər, sənaye nümayəndələri, həmkarlar ittifaqları və beyin mərkəzləri təmsilçilərindən ibarət komitə işə başlayacaq.
Berlin uzun illər Çini Almaniya sənayesinin inkişafına töhfə verən açıq qlobal ticarət sisteminin təbii müttəfiqi hesab edirdi. Lakin son hadisələr, xüsusən Çinin avtomobil sektorunu təhdid edən nadir yeraltı metallara ixrac məhdudiyyətləri, Berlini bu yanaşmanı yenidən nəzərdən keçirməyə vadar edib.
Komitə ildə iki dəfə parlamentə hesabat verəcək.