Bakı. Trend:
"Əl-Cəzirə" kanalında dekabrın 6-da Azərbaycanın uğurlu daxili və xarici siyasəti haqqında reportaj efirə gedib. Trend kanala istinadən xəbər verir ki, reportajda Azərbaycanın Rusiya, Türkiyə, İran, Gürcüstan və Ermənistan ilə həmsərhəd olduğu və Xəzər dənizinə çıxışı olduğu qeyd olunaraq, ölkədə müxtəlif millətlərin nümayəndələrinin sülh şəraitində yaşadığı vurğulanır.
Reportajda Azərbaycanın prezident üsul-idarəsinə malik ölkə olduğu, xalqımızın ümummilli və tarixi lideri Heydər Əliyevin hakimiyyətə qayıdışı və Prezident İlham Əliyevin rəhbərliyi altında ölkənin inkişafı, daxili siyasətin sabitliyi, hakim Yeni Azərbaycan partiyası ilə bərabər qanunverici orqanda müxalifət partiyalarının təmsil olunması və siyasi plüralizm mühiti barədə məlumat verilir.
Azərbaycanın qonşu dövlətlərlə əlaqələrdə və regional siyasətdə tarazlı və müvazinətli xarici siyasət həyata keçirdiyi qeyd olunur. Azərbaycan XİN-in mətbuat xidmətinin rəhbəri Hikmət Hacıyev "Əl-Cəzirə" kanalının müxbiri Ömər Kaşramın "Azərbaycanın uğurlu xarici və regional siyasətinin sirri nədədir" sualına cavabında bildirir ki, Azərbaycan beynəlxalq hüququn norma və prinsiplərini rəhbər tutaraq müstəqil xarici siyasət həyata keçirir, digər dövlətlərin daxili işlərinə qarışmır, bərabərhüquqlu və qarşılıqlı faydalı əməkdaşlıq əlaqələri qurur.
Verilişdə Ermənistan-Azərbaycan Dağlıq Qarabağ münaqişəsinin həll edilməməsinin Azərbaycanın üzləşdiyi ən ciddi problem olaraq qalmaqda davam etməsi qeyd olunaraq, Azərbaycanın bütün imkanlardan istifadə edərək münaqişəni həll etmək əzmində olduğu vurğulanır.
4 dekabr tarixindən başlayaraq, "Əl-Cəzirə" kanalında Azərbaycan haqqında silsilə verilişlər efirə gedir. 4 dekabr tarixində verilmiş reportajda Azərbaycanın iqtisadi inkişafı, neft-qaz sektoru ilə bərabər qeyri-neft sektorunun inkişafı və iqtisadiyyatın şaxələndirilməsi, ölkəmizin sənaye, turizm, gəmiqayırma, nəqliyyat və logistika sektorunun inkişafı haqqında məlumat verilir.
Trend-in ən mühüm və maraqlı xəbərlərini "Telegram"da izləyin
.jpg)
