Avstriya, Vyana, 12 iyun / Trend müxbir A.Ələsgərov/ Avropa Birliyinin xüsusi nümayəndəsi Piter Semnebi cümə axşamı ATƏT-də təmsil etdiyi qurumun Cənubi Qafqazdakı fəaliyyətinin təqdimatını keçirib. Xüsusi nümayəndə institutunun regiondakı fəaliyyətinin təqdimatı ATƏT-in Vyanadakı Daimi Şurasının iclasında baş tutub. Bu barədə bu gün Trend agentliyinə Semnebinin özü məlumat verib.
"Təqdimat mərasimində mən Cənubi Qafqazın Avropa Birliyi üçün strateji əhəmiyyətindən danışdım. Bu, AB-nin bu bölgəyə yaxınlaşması ilə bağlıdır", - deyə diplomat vurğulayıb. Onun sözlərinə görə, təqdimatın əsas məğzi Cənubi Qafqazdakı münaqişələrə yönəlmişdir. Konkret olaraq xüsusi diqqət Abxaziya münaqişəsinə və bu problemlə əlaqədar Gürcüstanla Rusiya arasında yaranmış gərginliyin azalmazına ayrılmışdır.
Semnebi Qarabağ münaqişəsini də həssas mövzu kimi dəyərləndirib. O qeyd edib ki, Avropa Birliyi bu problemin həlli məqsədilə yaradılmış ATƏT-in Minsk qrupunun fəaliyyətini dəstəkləyir. Semnebi Ermənistan və Azərbaycan prezidentlərinin Sankt-Peterburqda görüşdüyü və nizamlanma prosesini müzakirə etdiyini yaxşı amil adlandırıb. "Lakin yüksək səviyyədəki görüşlərlə yanaşı iki ölkənin müxtəlif icmalarının nümayəndələrinin görüş keçirməsi də faydalı olardı", - deyə diplomat əlavə edib.
"Bü münaqişələr Cənubi Qafqazdakı təhlükəsizlik və inkişaf üçün böyük maneədir və Avropa Birliyi ilə birbaşa əlaqəsi var", - deyə Semnebi vurğulayıb.
Semnebi bildirib ki, təqdimat mərasimində həmçinin AB-nin xüsusi diqqət yetirdiyi demokratik dəyişikliklər məsələsinə, habelə Ermənistan və Gürcüstandakı seçkidən sonrakı duruma toxunub.
Məqalə müəllifi ilə bu ünvan vasitəsi əlaqə saxlamaq olar: [email protected]
