Azərbaycan, Bakı, 31 oktyabr/ Trend , müxbir A.Hüseynbala / Azərbaycanın iqtidaryönlü partiyalarının birləşdiyi Məşvərət Məclisinin yaxın vaxtlarda blok kimi formalaşması nəzərdə tutulur.
"Məşvərət Məclisinin bloka çevrilməsini zaman da diqtə edir", - cümə günü Trend -a Məşvərət Məclisinə daxil olan Demokratik Azərbaycan Dünyası Partiyasının (DADP) sədri Məmməd Əlizadə bildirib.
Trend -ın arayışı: İqtidaryönlü partiyanın daxil olduğu Məşvərət Məclisi 1998-ci ildə yaradılıb. Qurumda hakim Yeni Azərbaycan Partiyası, Demokratik Azərbaycan Dünyası Partiyası, Demokratik Maarifçilik Partiyası, Azad Respublikaçılar Partiyası, Respublikaçılar Partiyası, Ana Vətən Partiyası, Sosial Rifah Partiyası, Milli Dövlətçilik Partiyası, Azərbaycan Naminə Alyans Partiyası təmsil olunur. Hazırda Nizamnamədə təsbit olunmuş rotasiyaya uyğun olaraq Məşəvərət Məclisinə sədrlik Yeni Azərbaycan Partiyasına həvalə olunub.
Əlizadənin sözlərinə görə, vətəndaş cəmiyyəti quruculuğunda siyasi hərəkatların birgə fəaliyyəti vacib və çox əhəmiyyətlidir.
"İndi "Siyasi partaylar haqqında" qanuna dəyişikliklər edilməsi nəzərdə tutulur. Bu qanunun təkmilləşdirilməsi də partiyalardan daha ciddi əməkdaşlıq tələb edir", - DADP sədri vurğulayıb.
Məşvərət Məclisinin prezident seçkisində birgə fəaliyyət göstərməməsinə gəldikdə, Əlizadə deyib ki, bunun səbəbi hakim Yeni Azərbaycan Partiyasının qurumda təmsil olunan bütün siyasi hərəkatların seçki kampaniyasında ayrı-ayrılıqda iştirak etməsi barədə qərarı olub.
Məqalə müəllifi ilə əlaqə ünvanı: [email protected]
