Azərbaycan, Bakı, 15 iyul /Trend, müxbir Ü.Sadıxova/
ABŞ İraqda demokratiyanın bərqərar olmasına görə mənəvi və fiziki məsuliyyət daşıyır, ona görə də gələcək İraq hökumətinin formalaşmasına təzyiq göstərmək üçün kifayət qədər gücə malikdir. İraqın vitse-prezidentinin müşaviri Xəlil Əzrəvi belə hesab edir.
"ABŞ hökumətin formalaşmasına siyasi təzyiq göstərə bilər, çünki İraqda demokratiyanın bərqərar olmasına görə onların üzərinə məsuliyyət qoyulub", - məşhur İraq siyasətçisi Tariq əl-Haşiminin siyasi məsləhətçisi Əzrəvi Trend-ə bildirib.
Əl-Haşimi İyad Əllavinin "əl-İraqiyyə" koalisiyasının tərkibinə daxil olan "Yenilənmə" blokunun lideridir. İyad Əllavi mart ayında keçirilən parlament seçkilərində iştirak edib və yerlərin əksəriyyətini (325 yerdən 91-ni) qazanıb. Lakin mütləq səsçoxluğu əldə etmək üçün 163 mandat qazanmaq lazım idi. İkinci yeri hazırkı Baş nazir Nuri əl-Malikinin rəhbərlik etdiyi "Qanun dövləti" bloku tutub.
Ən iri bloklar olan əl-Maliki ilə Əllayi arasında koalisiya hökumətinin yaradılması haqqında danışıqlara baxmayaraq, İraqda dörd aydan bəri siyasi boşluq qorunub saxlanılır ki, bu da 2011-ci ilin sonunadək qoşunları ölkədən çıxarmağı planlaşdıran ABŞ-ı narahat edir.
İraqın xarici işlər naziri Hüşyar Zibari amerikalı həmkarı Hillari Klintonla birgə keçirdiyi mətbuat konfransında Vaşinqtonu ölkədəki siyasi boşluğun aradan qaldırılması üçün iraqlı siyasətçilərə kömək etməyə çağırıb. Bu barədə "əl-Cəzirə" ərəb telekanalı məlumat verib.
Zibari hesab edir ki, ABŞ İraqda yeni hökumətin yaranması üçün kifayət qədər potensiala malikdir. Lakin bununla yanaşı, o, Vaşinqtonun məhz hansı addımları atmalı olması barədə jurnalistlərin suallarını cavablandırmaqdan imtina edib.
Əzrəvini fikrincə, Vaşinqtonda İraqdakı siyasi proseslərin bütün əhəmiyyəti və təsirini anlayırlar, ona görə də Ağ ev bu vəziyyətdə necə davranmaq lazım gəldiyini özü bilir.
"ABŞ-ın rolu əvvəlki kimi güclü və fəal olaraq qalır və təhlükəsizlik haqqında sazişdə əks olunduğu kimi [Amerika qoşunlarının çıxarılmasını nəzərdə tutan], ABŞ İraqda demokratik hüquqlara əməl olunmasına görə məsuliyyət daşıyır", - Əzrəvi bildirib.
Ötən həftənin əvvəlində İraqa planlaşdırılmamış səfər edən ABŞ-ın vitse-prezidenti Co Bayden yaranmış vəziyyətdən çıxış yolu axtarmaq və İraqdakı qeyri-sabitliyi həll etmək üçün ölkədəki bütün siyasi tərəflərlə danışıqlar aparıb. Eyni zamanda, ABŞ-ın Yaxın Şərqdəki komandanlığı bəyan edib ki, gələn il qoşunların ölkədən çıxarılması barədə planlarını dəyişməyiblər.
